פרק קיג
[א] הַ֥לֲלוּ יָ֨הּ׀ פ
הַ֭לֲלוּ עַבְדֵ֣י יְהוָ֑ה הַֽ֝לֲל֗וּ אֶת־שֵׁ֥ם יְהוָֽה:

[ב] יְהִ֤י שֵׁ֣ם יְהוָ֣ה מְבֹרָ֑ךְ מֵ֝עַתָּ֗ה וְעַד־עוֹלָֽם:
[ג] מִמִּזְרַח־שֶׁ֥מֶשׁ עַד־מְבוֹא֑וֹ מְ֝הֻלָּ֗ל שֵׁ֣ם יְהוָֽה:
[ד] רָ֖ם עַל־כָּל־גּוֹיִ֥ם ׀ יְהוָ֑ה עַ֖ל הַשָּׁמַ֣יִם כְּבוֹדֽוֹ:
[ה] מִ֭י כַּיהוָ֣ה אֱלֹהֵ֑ינוּ הַֽמַּגְבִּיהִ֥י לָשָֽׁבֶת:
[ו] הַֽמַּשְׁפִּילִ֥י לִרְא֑וֹת בַּשָּׁמַ֥יִם וּבָאָֽרֶץ:
[ז] מְקִ֥ימִ֣י מֵעָפָ֣ר דָּ֑ל מֵ֝אַשְׁפֹּ֗ת יָרִ֥ים אֶבְיֽוֹן:
[ח] לְהוֹשִׁיבִ֥י עִם־נְדִיבִ֑ים עִ֝ם נְדִיבֵ֥י עַמּֽוֹ:
[ט] מֽוֹשִׁיבִ֨י׀ עֲקֶ֬רֶת הַבַּ֗יִת אֵֽם־הַבָּנִ֥ים שְׂמֵחָ֗ה הַֽלֲלוּ־יָֽהּ: פ