פרק קכ
[א] שִׁ֗יר הַֽמַּ֫עֲל֥וֹת פ
אֶל־יְ֭הוָה בַּצָּרָ֣תָה לִּ֑י קָ֝רָ֗אתִי וַֽיַּעֲנֵֽנִי:

[ב] יְֽהוָ֗ה הַצִּ֣ילָה נַ֭פְשִׁי מִשְּׂפַת־שֶׁ֑קֶר מִלָּשׁ֥וֹן רְמִיָּֽה:
[ג] מַה־יִּתֵּ֣ן לְ֭ךָ וּמַה־יֹּסִ֥יף לָ֗ךְ לָשׁ֥וֹן רְמִיָּֽה:
[ד] חִצֵּ֣י גִבּ֣וֹר שְׁנוּנִ֑ים עִ֝ם גַּחֲלֵ֥י רְתָמִֽים:
[ה] אֽוֹיָה־לִ֭י כִּי־גַ֣רְתִּי מֶ֑שֶׁךְ שָׁ֝כַ֗נְתִּי עִֽם־אָהֳלֵ֥י קֵדָֽר:
[ו] רַ֭בַּת שָֽׁכְנָה־לָּ֣הּ נַפְשִׁ֑י עִ֝ם שׂוֹנֵ֥א שָׁלֽוֹם:
[ז] אֲֽנִי־שָׁ֭לוֹם וְכִ֣י אֲדַבֵּ֑ר הֵ֝מָּה לַמִּלְחָמָֽה: פ