פרק קכג
[א] שִׁ֗יר הַֽמַּ֫עֲל֥וֹת פ
אֵ֭לֶיךָ נָשָׂ֣אתִי אֶת־עֵינַ֑י הַ֝יֹּשְׁבִ֗י בַּשָּׁמָֽיִם:
[ב] הִנֵּ֨ה כְעֵינֵ֪י עֲבָדִ֡ים אֶל־יַ֤ד אֲֽדוֹנֵיהֶ֗ם כְּעֵינֵ֣י שִׁפְחָה֮ אֶל־יַ֪ד גְּבִ֫רְתָּ֥הּ כֵּ֣ן עֵ֭ינֵינוּ אֶל־יְהוָ֣ה אֱלֹהֵ֑ינוּ עַ֝ד שֶׁיְּחָנֵּֽנוּ:
[ג] חָנֵּ֣נוּ יְהוָ֣ה חָנֵּ֑נוּ כִּי־רַ֝ב שָׂבַ֥עְנוּ בֽוּז:
[ד] רַבַּת֮ שָֽׂבְעָה־לָּ֪הּ נַ֫פְשֵׁ֥נוּ הַלַּ֥עַג הַשַּׁאֲנַנִּ֑ים הַ֝בּ֗וּז לִגְאֵ֥יוֹנִֽים לִגְאֵ֥י יוֹנִֽים: פ