פרק קכד
[א] שִׁ֥יר הַֽמַּעֲל֗וֹת לְדָ֫וִ֥ד פ
לוּלֵ֣י יְ֭הוָה שֶׁהָ֣יָה לָ֑נוּ יֹאמַר־נָ֝א יִשְׂרָאֵֽל:

[ב] לוּלֵ֣י יְ֭הוָה שֶׁהָ֣יָה לָ֑נוּ בְּק֖וּם עָלֵ֣ינוּ אָדָֽם:
[ג] אֲ֭זַי חַיִּ֣ים בְּלָע֑וּנוּ בַּחֲר֖וֹת אַפָּ֣ם בָּֽנוּ:
[ד] אֲ֭זַי הַמַּ֣יִם שְׁטָפ֑וּנוּ נַ֝חְלָה עָבַ֥ר עַל־נַפְשֵֽׁנוּ:
[ה] אֲ֭זַי עָבַ֣ר עַל־נַפְשֵׁ֑נוּ הַ֝מַּ֗יִם הַזֵּידוֹנִֽים:
[ו] בָּר֥וּךְ יְהוָ֑ה שֶׁלֹּ֥א נְתָנָ֥נוּ טֶ֝רֶף לְשִׁנֵּיהֶֽם:
[ז] נַפְשֵׁ֗נוּ כְּצִפּ֥וֹר נִמְלְטָה֮ מִפַּ֪ח י֫וֹקְשִׁ֥ים הַפַּ֥ח נִשְׁבָּ֗ר וַאֲנַ֥חְנוּ נִמְלָֽטְנוּ:
[ח] עֶ֭זְרֵנוּ בְּשֵׁ֣ם יְהוָ֑ה עֹ֝שֵׂ֗ה שָׁמַ֥יִם וָאָֽרֶץ: פ