פרק קמח
[א] הַלֲלוּ יָהּ׀ פ
הַלֲלוּ אֶת־יְהוָה מִן־הַשָּׁמַיִם הַלֲלוּהוּ בַּמְּרוֹמִים:

[ב] הַלֲלוּהוּ כָל־מַלְאָכָיו הַלְלוּהוּ כָּל־צְבָאָו צְבָאָיו:
[ג] הַלֲלוּהוּ שֶׁמֶשׁ וְיָרֵחַ הַלֲלוּהוּ כָּל־כּוֹכְבֵי אוֹר:
[ד] הַלֲלוּהוּ שְׁמֵי הַשָּׁמָיִם וְהַמַּיִם אֲשֶׁר׀ מֵעַל הַשָּׁמָיִם:
[ה] יְהַלֲלוּ אֶת־שֵׁם יְהוָה כִּי הוּא צִוָּה וְנִבְרָאוּ:
[ו] וַיַּעֲמִידֵם לָעַד לְעוֹלָם חָק־נָתַן וְלֹא יַעֲבוֹר:
[ז] הַלֲלוּ אֶת־יְהוָה מִן־הָאָרֶץ תַּנִּינִים וְכָל־תְּהֹמוֹת:
[ח] אֵשׁ וּבָרָד שֶׁלֶג וְקִיטוֹר רוּחַ סְעָרָה עֹשָׂה דְבָרוֹ:
[ט] הֶהָרִים וְכָל־גְּבָעוֹת עֵץ פְּרִי וְכָל־אֲרָזִים:
[י] הַחַיָּה וְכָל־בְּהֵמָה רֶמֶשׂ וְצִפּוֹר כָּנָף:
[יא] מַלְכֵי־אֶרֶץ וְכָל־לְאֻמִּים שָׂרִים וְכָל־שֹׁפְטֵי אָרֶץ:
[יב] בַּחוּרִים וְגַם־בְּתוּלוֹת זְקֵנִים עִם־נְעָרִים:
[יג] יְהַלֲלוּ׀ אֶת־שֵׁם יְהוָה כִּי־נִשְׂגָּב שְׁמוֹ לְבַדּוֹ הוֹדוֹ עַל־אֶרֶץ וְשָׁמָיִם:
[יד] וַיָּרֶם קֶרֶן׀ לְעַמּוֹ תְּהִלָּה לְכָל־חֲסִידָיו לִבְנֵי יִשְׂרָאֵל עַם קְרֹבוֹ הַלֲלוּ־יָהּ: פ