פרק פז
[א] לִבְנֵי־קֹ֭רַח מִזְמ֣וֹר שִׁ֑יר ס יְ֝סוּדָת֗וֹ בְּהַרְרֵי־קֹֽדֶשׁ:

[ב] אֹהֵ֣ב יְ֭הוָה שַׁעֲרֵ֣י צִיּ֑וֹן מִ֝כֹּ֗ל מִשְׁכְּנ֥וֹת יַעֲקֹֽב:
[ג] נִ֭כְבָּדוֹת מְדֻבָּ֣ר בָּ֑ךְ עִ֖יר הָאֱלֹהִ֣ים סֶֽלָה:
[ד] אַזְכִּ֤יר׀ רַ֥הַב וּבָבֶ֗ל לְֽיֹ֫דְעָ֥י הִנֵּ֤ה פְלֶ֣שֶׁת וְצֹ֣ר עִם־כּ֑וּשׁ זֶ֝ה יֻלַּד־שָֽׁם:
[ה] וּ֥לֲצִיּ֨וֹן׀ יֵאָמַ֗ר אִ֣ישׁ וְ֭אִישׁ יֻלַּד־בָּ֑הּ וְה֖וּא יְכוֹנְנֶ֣הָ עֶלְיֽוֹן:
[ו] יְֽהוָ֗ה יִ֭סְפֹּר בִּכְת֣וֹב עַמִּ֑ים זֶ֖ה יֻלַּד־שָׁ֣ם סֶֽלָה:
[ז] וְשָׁרִ֥ים כְּחֹלֲלִ֑ים כָּֽל־מַעְיָנַ֥י בָּֽךְ: פ