פרק כו
[א] וַיַּ֥עַן אִיּ֗וֹב וַיֹּאמַֽר: פ
[ב] מֶה־עָזַ֥רְתָּ לְלֹא־כֹ֑חַ ה֝וֹשַׁ֗עְתָּ זְר֣וֹעַ לֹא־עֹֽז:
[ג] מַה־יָּ֭עַצְתָּ לְלֹ֣א חָכְמָ֑ה וְ֝תֻשִׁיָּ֗ה לָרֹ֥ב הוֹדָֽעְתָּ:
[ד] אֶת־מִ֭י הִגַּ֣דְתָּ מִלִּ֑ין וְנִשְׁמַת־מִ֝י יָצְאָ֥ה מִמֶּֽךָּ:
[ה] הָרְפָאִ֥ים יְחוֹלָ֑לוּ מִתַּ֥חַת מַ֝יִם וְשֹׁכְנֵיהֶֽם:
[ו] עָר֣וֹם שְׁא֣וֹל נֶגְדּ֑וֹ וְאֵ֥ין כְּ֝ס֗וּת לָאֲבַדּֽוֹן:
[ז] נֹטֶ֣ה צָפ֣וֹן עַל־תֹּ֑הוּ תֹּ֥לֶה אֶ֝רֶץ עַל־בְּלִי־מָֽה:
[ח] צֹרֵֽר־מַ֥יִם בְּעָבָ֑יו וְלֹֽא־נִבְקַ֖ע עָנָ֣ן תַּחְתָּֽם:
[ט] מְאַחֵ֥ז פְּנֵֽי־כִסֵּ֑ה פַּרְשֵׁ֖ז עָלָ֣יו עֲנָנֽוֹ:
[י] חֹֽק־חָ֭ג עַל־פְּנֵי־מָ֑יִם עַד־תַּכְלִ֖ית א֣וֹר עִם־חֹֽשֶׁךְ:
[יא] עַמּוּדֵ֣י שָׁמַ֣יִם יְרוֹפָ֑פוּ וְ֝יִתְמְה֗וּ מִגַּעֲרָתֽוֹ:
[יב] בְּ֭כֹחוֹ רָגַ֣ע הַיָּ֑ם וּ֝בִתְובֻנָת֗וֹ וּ֝בִתְבוּנָת֗וֹ מָ֣חַץ רָֽהַב:
[יג] בְּ֭רוּחוֹ שָׁמַ֣יִם שִׁפְרָ֑ה חֹלֲלָ֥ה יָ֝ד֗וֹ נָחָ֥שׁ בָּרִֽחַ:
[יד] הֶן־אֵ֤לֶּה׀ קְצ֬וֹת דְּרָכָ֗ו וּמַה־שֵּׁ֣מֶץ דָּ֭בָר נִשְׁמַע־בּ֑וֹ וְרַ֥עַם גְּ֝בוּרֹתָ֗ו גְּ֝בוּרֹתָ֗יו מִ֣י יִתְבּוֹנָֽן: ס